رياضاوي

من غابة الإسمنت .. الرياض

Living in Riyadh

الثلاثاء، صفر 21، 1427

تخلف ومرض ... تتوارثة الأجيال!



اليوم بعد انتهاء الدوام المدرسي .. عاد اخي الصغير وابن اختي (9 و 8 سنوات) اللذان يدرسان سوياً في مدرسة واحدة ... عادا من المدرسة ... وبعد ان نزلا من الباص سوياً ... ثم دخلا المنزل ... و بعد ان اغلقا الباب وتأكدا من رحيل الباص بزملاءهم ... ارتفعت الأصوات بينهم وتطور الأمر إلى اشتباك عنيف بين الإثنين استخدما فيه مختلف انواع الأسلحة من دفاتر وشنط واقلام .. وانتهاءا بالجزم - اعزكم الله - قمت انا وامي و فضينا الاشتباك ... كليهما كانا يبكيان ... وكل واحد يتهم الآخر بفضيحة الثاني امام زملاءة!!!! .. ... قلت خير .. خير ... وش السالفة؟؟ .. قال اخي ان ابن اختي فضحه بالباص وان اصحابه اصبحوا يعيروه في الباص وانه لن يركب الباص مرة اخرى ... ثم قال ابن اختي ان اخي من فضحه وليس هو ... وانه ايضا لن يركب بالباص ... ولن يعود للمدرسة ايضاَ ... وسيطلب من والده ان يبحث عن مدرسة اخرى !!! ... انا بصراحة خفت وقلت في نفسي الله يستر لا يكونوا عاملين بلوى في المدرسة ... قلت لهم قولو لي السالفة من طأ طأ .. لسلامو عليكو ... وقالو السالفة:

اخوي: اصدقاي في الباص ما عاد ينادوني الا يا اخو اسماء.. ويا اخو لطيفة ... بعد ما فضحني الدلخ (يعني الغبي) اللي قدامك - يقصد ابن اختي - وعلمهم بأسماء اخواتي كلهم

ابن اختي : وانا بعد ما عاد ينادوني الا بأخو نوره!! .. ومن يعرف اسم نوره غيرك في الباص ياذكي؟؟ .. اكيد انه انت اللي علمتهم ... مافيه غيرك وعشان كذا فضحتك

اخوي : اول شي مو انا اللي علمتهم ... انت نزلت من الباص امس واختك نوره طالعه في الشارع ..و قلت ادخلي يانوره ثم عرفوا اسمها ياغبييييي ... وبعدين هم عرفوا اسم وحدة ... ليش تقول لهم عن اخواتي الثلاث


ثم بدأ اشتباك آخر ... بإستخدام المراكي و الوسائد و الريموت كنترول

انا بصراحة ماقدرت امسك نفسي .... ضحكت بكل ما اوتيت من قوة ... ثم فكرت ان اعطي كل واحد طراق على وجهه ...

قلت لهم : Relax Relax boys ... It's not a big deal!!

شرحت لهم انهم على العكس ... المفروض انهم يفتخرون بأخواتهم .. وان معرفة اسماء الاخوات امر عادي وطبيعي ... وان كل المسلمين يعرفون اسماء زوجات الرسول ... وزوجات الصحابة واخواتهم ... وان الانسان في الجزيرة العربية كان يفتخر بإسم اخته ..بعضهم يتسمى بإسم اخته .. كأخو نوره واخو وضحى .. الخ الخ ... حتى ان الملك عبدالله واخواته يسمون بـ إخوان نورة .. .. وقلت لهم اني سأخذهم معي غدا لنأخذ اختي الطيفة من المدرسة ... واننا سنقوم بناداتها بالمايكرفون بإسمها للخروج من المدرسة ... طبعا هم لم يصدقوا ذلك ... وقالو وشلون رجال وتسوي كذا؟؟ ..وتحدوني ... قلت انه امر عادي وكثير من الناس ينادي اخته بإسمها الثلاثي ليس اسم العائلة فقط !!

سألتهم من ادخل فكرة ان اسم الاخت او الام عيب؟؟ ... قالوا ان كل الطلاب في المدرسة لا يريدون الافصاح بأسماء اخواتهم ... وفي حالة معرفة اسم اخت اي طالب ..ز فإن زملاءه كلهم يعيرونه بإسم اخته !!

بعدها تذكرت اننا عندما كنا في المرحلة الابتدائية والمتوسطة كنا نعاني من نفس شيء ... كانت تدور حروب و مؤامرات بين الطلاب لمعروفة اسماء الاخوات... وفي حال معرفتهم ... فإن نهاية العالم قد حلت.... نفسي اعرف ...ما سبب توارث هذا التخلف؟؟

18 Comments:

  • At 12:09 ص, Blogger ~ se3loah ~ said…

    الحمدلله والشكر
    تذكرت أخواني .. اللي لو يموت ما يقول اسم اخته
    ويحس عييب لو يعرفون باملدرسه اسماء خواته وامه
    واسمعهم على الغدا يسولفون .. شفت فلان طلع اسم اخته شذاوالا هدى .. ألخ

    يالله السعوديين فيهم تخلف غييير طبيعي
    وللمره الأولى على فكره اتفق معك

     
  • At 1:48 ص, Blogger متفرغ said…

    ههههههههههههه.... الله يحفظهم و يخليهم.... عندنا و عندكم خير ذكرتني بايام المدرسة كان الواحد يخاف يقول اسم امه او اخته علشان ما يعايرونه و ينادونه ولد فلانةاو اخو فلانة :)

     
  • At 9:20 ص, Blogger Lord Bin Sleet said…

    هههههههههههههههههههه
    والله من جد هذا الحال الى اخواني نفس الكلام، واللي منتب مصدقه ان معي شباب في الدوام تناقشنا في موضوع اسم الأم وكلهم يخافون يقولون ويستحون ، وانا كسرت الموضوع وقلت لهم اسم امي وقلت لهم اني افتخر فيها وفي اسمها ومع هذا الشي مازالوا يستحون

    مااقول الا الله يخلف علينا

     
  • At 1:36 م, Anonymous أحمد said…

    هههههههههههه من جد مشلكة..

    أذكر كانت كابوس من جد في الابتدائي.. و حتى واحد عرف اسم أمي و أختي عن طريق أخته الي تدرس مع أختي.. و أنواع البلاك ميل و التهديد.. إلين آخر شي ألفت أسماء بنات و قلت هذي أسماء أخواتك و أختي قالت لي.. قلت ان علمت أسماء أخواتي أبعلم أسماء أخواتك.. قعد يقول نصاب هذي ميب أسماء أخواتي.. قلت له الا انا متأكد.. و انتهت بسلام على كذا.. لأنه خايف يعيرونه بالأسماء الخيالية الي ألفتها..


    طبعا تكون مشكله نفسيه للطفل لأن كل الي حوله بيعايرونه بالأسماء.. و صعب تقنعه. و موب العيب في الأسماء... الي يضايق الطفل أن الكل بيعايره بهالشي..

    يعني ممكن يعايرونه أن القلم الي يستخدمه أزرق.. و كل الفصل جالس يضحك على هالشي..صحيح ما له معنى.. لكن مجرد استفزاز.. من بكرا نلاقيه مغير القلم..

    يا أنه يحطون مادة يعلنون فيها أسماء أخوات و أمهات الي في الفصل :P..
    أو يكبرون و يعقلون انشالله

     
  • At 12:37 م, Blogger Abu-Joori said…

    مثل هذا التصرف دليل على العقلية الإجتماعية التي لا تفكر في المراءة إلا في صورة واحدة .. صورة العيب و صورة الشي الذي يجب أن يغطى و يستر و يمنع من كل شئ .. حتى يجب أن يمنع الأخرون من معرفة إسمه.

     
  • At 8:59 م, Anonymous قائد بلا جيش said…

    هههههههههههههههه الله يحفظهم ويخليهم لك .. لكن اسأل نفسك انت كم مره قعدت تسولف مع اخوياك ودق جوالك وقعدت تقول لأختك روحي اسألي اختك الثانيه الصغيره اللي بالثانوي لا مب هذي الثانيه ههههههههههههههههههههه



    وبعدين شوف الشجاع
    lord bin steel

    حتى وهو قاعد يسولف ما قدر يقول اسم خخخخخخخخخ لو من باب اثبات وجهة النظر


    أنا أسم امي شيخه .. وهي بالفعل اسم على مسمى وأفخر بها

     
  • At 2:04 ص, Blogger ~ se3loah ~ said…

    قائد بلا جيش :
    يعني لازم لورد يقول اسم امه والا اخته عشان يثبت لكم انه ضد هالفكره

    والله كلامك مهب بعيد عن اللي يسوونه بزران المتوسط .. يستفزون الواحد بالكلام عشان ياخذون اللي يبونه
    وانت قاعد تستفزه عشان تنبسط وتوسع صدرك

     
  • At 5:15 ص, Blogger Riyadhawi said…

    هلا سعلوة
    اهم مافي الموضوع هو اتفاقنا النادر :)

    تحياتي

    هلا متفرغ
    تصدق كنت احسب المرض هذا عندنا بس ... عاديناكم شكلنا :)

    تحياتي

    هلا لورد
    صحيح فيه ناس إلى الآن يستحي يقول اسم امه او اخته او حتى جدته ... حتى بعض اقاربي ... وهنا يطلع عرق النذالة عندي ... وتلاقيني اتكلم مثلا واقول اسم جدته قدام احد زملاءة او اصحابه وتلقى وجهه يتلون من الاحراج هههه .. وبعد ما يروح الغريب ويلومني على اسم جدته ... وذانك ماتسمع الا انواع التسفيل ... طبعا انا اللي اسفل فيه ههههه

    تحياتي


    هلا احمد
    نور البلوق :)

    اما المشكلة النفسية .. صادق .. انا اشوفها على اخوي و ولد اختي ... تصدق إلى الآن ما بعد انتهت الازمة بينهم ؟ اما تأليف الاسامي .. حركة حلوة تلقاه يخاف :)

    تحياتي لك

    ---

    هلا ابو جوري

    كلامك صحيح نوعا ما ... لكن اللي نفسي اعرفه ليش ينتشر بين الصغار اكثر من الكبار؟ حتى في الاسر اللي ماعندها مشاكل في الافصاح عن اسماء نساءهم تحصل الصغار من نفس الاسر يعتبرون معرفة اسم الاخت او الام فضيحة بجلاجل !!

    تحياتي


    هلا قائد

    ماعندي مشكلة ... اذا رديت على اي مكالمة بالجوال سواءا اختي او خالتي او عمتي ...ارد عليه بإسمها يعني هلا فلانة ... وخل احد يقول شيء !!

    وبالنسبة للورد
    احيلك على رد سعلوة ههههههه


    تحياتي

     
  • At 5:27 م, Blogger ~Falcon~ said…

    ههههههه ياخي انا ملاحظ ان هالمشكله دائما في المدارس الحكوميه.....بينما الأهليه تختلف فلاأحد يعير انتباه لموضوع سخيف زي كذا...

    بس المفروض يقضون على هذي الظاهره السخيفه جدا....يعني توهم بزران ومن الحين يتكلمون في مواضيع كذا....
    ============
    بس حركتك حلوه على الأقل يشيلون من بالهم ذا الموضوع....

    ومره ثانيه اذا فيه طقاق بـ مراكي واقلام ودفاتر تكفى نادني تراني اقدر ذا الطقاق اللي كذا

     
  • At 3:29 م, Blogger ضايعة بين البشر said…

    ههههه

    عقدة أزلية .. في العيال

    تقهر الصراحة

    ذكرتني بسالفة

    ..

    مرة رحنا لمدينة ملاهي في الشرقية

    و صادف ان بعض عيال اقاربنا موجودين

    بدون أهلهم

    ..


    بعد ما رجعنا للرياض
    اتصلت علي وحدة من اخواتهم و قالت
    تدرين وش قالوا اخواني ؟!

    قالوا
    أبو فلان فضحنا ينادي على بناته بأعلى صوته

    !!!

    المشكلة انهم طلاب جامعة و ثنوي

     
  • At 12:18 ص, Blogger ارحم دماغك! said…

    :)
    بتفكروني بالحلقة بتاعت طاش ما طاش

    ههههههههههههههه

    على فكرة صحيح، لو كان الواحد امه مشهورة بقى يعمل إيه؟
    يبقى مفضوح فضيحة صعبة!!
    متبرقوليش ماما اسمها إيمان..

    هأ هأ هااااااااء..انتوا تلاقيكوا مش عارفين اسمي انا
    هههههههههههههه
    افتكر والدتي مرة كانت بتكلم صديقة سعودية لها على التليفون..فقالت لها "أيوة يا حصة" وألاقي وش الوالدة اتغير..فبعدين بتحكيلي تقول لي حصة صوتت، وقعدت تقول لها فضحتيني، زمان جوزك عرف اسمي :))))

    على فكرة عادي ياباشا، على فكرة مفهاش حاجه لو ده سلو البلد يعني..لو هي عادة من عاداتكم مفيش داعي تسموها تخلف يعني:)
    أصل محدش قال انه حرام..
    وبعدين في بعض القبائل الأفريقية يعتبر اسم الأفراد -رجال ونساء- من أخطر الأسرار التي لا يجب أن تعرف خارج القبيلة، تبريرهم لهذه العادة هو انتشار السحر الأسود وانه لو السحرة عرفوا أسماءهم ممكن يسحروهم:)

     
  • At 3:29 ص, Anonymous AbOd said…

    براءة اطفال
    يوم كنا صغار كنا اردى منهم

    بس على فكرة اخو نورة مهوب الملم عبدالله هذا ابو الله يسلمك :)

     
  • At 2:16 م, Anonymous أبو سعد said…

    لا يجب أن يكون لدى كل منا أي حرج أو ردة فعل غير راقية... لماذا تتكلمون عن الموضوع بإسلوب مستفز؟؟؟

    في كثير من الدول التي يوجد لديها عادات وتقاليد تنبع من حضاراتهم الضاربة جذورها في التاريخ وعند معرفة الباحث العلمي الذي يزور أحد تلك الدول يحاول الوصول إلى أصل تلك العادات والتقاليد مع إحترامه لها بدون أن يسفهها أو ينتقدها... لأن لكل جماعة من البشر عادات وتقاليد تحتوي على الجيد والسيء منها.

    لذا يجب أن يكون لدينا إحترام لتلكم العادة التي تستهزئون بها كما أرى.. ولا بد من البحث فيها ومعرفة أصلها حتى نتعرف على المسببات لتلك العادة.. لا أن نستهزء بها ونقول عنها تخلف..

    فحتى الدول المتقدمة حضارياً وإقتصادياً لديها الكثير من العادات والتقاليد التي تتعارض مع العقل البشري ومن قبله الأديان السماوية وبالرغم من ذلك لم يقم أياً منا بإنتقادها.. بل تجد من يقوم بتقليدها على أساس أن هذا هو التحضر والتقدم..


    تحياتي؛؛؛

     
  • At 7:04 م, Anonymous ساهرة said…

    طيب ليه الحين البنات مايستحون يقولون اسامي اخوانهم؟؟
    الحين اشوف البنات عندنا تعرض صور اخوانها على البنات يعنني شوفوني تراي اخوي حلو ومزيون !!

    طبعا اخبر ايام المدرسه القاصي والداني يعرفون اخواني واساميهم..مب لشي بس لان ماتحلالهم الطلعه بالشوارع الا اذا جاء باصي..وكل اللي بالباص يسألني هذا منهو وهذا وش اسمه!!..
    لين قاموا البنات يتمادون كل شوي تجيني وحده شفت اخوك فلان في المجمع الفلاني..شفت فلان بمدري وين..شفت فلان بقريح !!

    لا ووحده مره قهرتني تقول شفت اخوك يلاحق بنات بالمجمع الفلاني..اقولها يابنت الحلال اخوي بمكه!!! تقول لا يلعب عليكم يقول انها رايح يعتمر وهو رايح يغازل..
    وش هالاستهبال ذا.؟؟
    طيب اخوي لاعب علينا يقول انه رايح يعتمر ومشيناها..انتي وشوله تحطين عينتس بعينه وتقزينه لين عرفتي انه اخوي؟؟!!

    عاد عقبها..من دخلت الكليه وانا اصرف اذا احد سألني عن اسامي اخواني

    لا واذا بغيت اسولف اقول : اخوي الكبير..اخوي الوسطي ..اخوي الصغير خخخخخخخ حركه صح؟؟
    حتى ياويلهم ياسواد ليلهم اذا طلعوا من البيت وقت جيه الباصات..ماودي يشوفونهم البنات همن بكره ينشبون لي شفناه هنا والا شفناه هناك !!

    ومن هذا المنطلق احب اوصل رساله لكل البنات بان ماتعلم اسامي اخوانها لاحد ولا توري صورهم لخوياتها..واذا احد عرف اسامي اخوانها تسحب ملفها وتهاجر لقريح عشان محد يفضحها ان لقوا اخوها يسعسع بالمجمعات

     
  • At 8:53 ص, Blogger SaudiEve said…

    المشكلة:
    اعتقد ان هذي حالة نادره
    يمكن فيه طالب في المدرسة أمه أو أخته تستدعي الخجل "تفشل" مما تسبب أن تنتشر هذه الثقافة في هذه المدرسة.. مثلاً تاجرة مخدرات أو خريجة سجون


    الحل:
    "ثم فكرت ان اعطي كل واحد طراق على وجهه "

     
  • At 9:26 م, Blogger Riyadhawi said…

    شكرا لكم جميعا على المشاركة واعتذر عن الرد على تعليقاتكم حالياً

     
  • At 2:35 ص, Anonymous مؤيد said…

    هههههههههههههههه!
    والله ضحكتني من جد يا رياضاوي !
    افتكرت مرة وانا صغير .. كنت قاعد برة البيت العب مع عيال الجيران .. المهم اختي كمان طلعت تلعب مع بنتهم .. وبعدين ولد جارنا تعب من اللعب وراح جلس يريح قدام باب بيتهم .. واختي واخته كانوا عند باب بيتهم قاعدين شطورين .. اختي هاداك الوقت لسه يادوب سبعه تمنية سنين .. وانا تقريبا في متوسطة اولى او تانية .. المهم سمعت ولد جيراننا وهو برضه قدي سنا يعني يسأل أختي اش اسمك ؟(ماكان قصده شي هو كده طبيعته) .. وشوف عاد وجهي اتغير وصار الوان وصرت انا من بعيد اطالع لأختي .. ابرقلها عيوني .. أأشرلها بتلاته اصابيع أن يا ويلكِ يافتاة لو نطقتي!.. والله هي ماهي فاهمه شي .. المهم قالت له أنفال!.. انا دورتي الدموية كانت تبغى تتوقف .. المهم بعد مالولد جا يكمل اللعب .. رحت انا لأختي وقلتلها من تحت ضرسي: قومي ياكلبة خشي البيت .. ومايمنع قفا وهي رايحة .. مسكينة راحت تبكي.. المهم بعد ماخلصت انا لعب دخلت البيت امي قالت لي ليش تضربها.. قلتلها اسأليها!!(قال دحين هي الغلطانة واخوكم مسوي عنتر زمانه!).. المهم قلتلها كيف تقول اسمها كده للولد .. ماتستحي !
    ومرت الأيام واتعلمنا من جيراننا هادول انه شي عادي .. هما كانوا يقولوا ماما وبابا وأسامي أخواتهم عادي .. وبالمناسبة هم شديدي الخلق والاحترام ولا هم متساهلين ولاشي .. واحنا كنا نقول ماما وبابا بس جوة البيت .. واذا سألنا احد برة البيت .. ايوة ابوي .. ويبه .. والوالد وكده ..
    الفكرة مو في انه نحافظ على هادي العاده او نسيبها .. الفكرة خليك على طبيعتك .. يعني من جد ليش التشنج ده من ناحية الأسماء؟ .. عادي جدا مافيها حاجه .. دحين كل الحارة عندنا ماصاروا يلاقوا حرج من ذكر أسامي البنات ..
    وربي يحفظ اخوك وابن اختك .. شكرا لأنك علمتهم يعتزوا بأخواتهم .. ده في نظري اهم من انه يذكروا اسماء اخواتهم او لا!
    الف تحية

     
  • At 1:10 ص, Anonymous غير معرف said…

    Best regards from NY! » »

     

إرسال تعليق

<< Home